اسكربت كامله تفاعلوووووو
- حاله نفسيه؟! وانا مالي!!
= كل اللي دخلوا فشلوا
- انا مالي بردو م يفشلوا ولا يولعوا حتي
= ملك !! انتِ نسيتي نفسك؟
- يا فندم مش قصدي بس انا مالي ومال مستشفي المجانين دي
= هو مش مجنون
- انا اللي مجنونه
= كلنا عارفين كده
- الله يسامحك انا مش هرد عليك انت قد ابويا
اتنهد = يا ملك يا حبيبتي انا محتاج مساعدتك
- هو انا عارفه اساعد نفسي؟ ده انا عبيطه
= انتِ ناجحه في شغلك
- ايوه لأني بخش اعمل عمليات جراحه .. لأني قعدت 7 سنين في طب اذاكر مش بعمل كبده
= لسانك عايز قصه
- بابا بيقول كده بردو ، بس ده مش موضوعنا ، انا باقي مالي بالمرضي النفسيين ؟!!
= المريض رافض يتعامل مع حد وبيطفش الدكاتره ، انتِ اسلوبك حلو وممكن يسمعك
- انا؟ ده انا عبيطه حتي ، وبعدين انا مالي بردو ده مش شغلي
= طب اعتبريها خدمه منك ليا .. انا عمك يعني في مقام والدك
- سوري الشغل شغل واحنا دلوقتي في المستشفي .. وانا في الشغل معرفش ابويا شخصياً
= حلو اوي .. اعتبري نفسك خدتي استماره 6
- يعني ايه؟
= يعني يـ تعالجيه وتتكلمي معاه يـ اعتبري نفسك مرفوده
- والله!! ده انا حتي بنت اخوك يجدع !!
= سوري انا في الشغل معرفش ابويا .. بره
قولت بغيظ - ماشي يعمي
خدت شنطتي وروحت .. ده عمي؟! اومال لو مكنتش بنت اخوه يعني !! اهل دول وصحاب ولمه ولا دول تعابين وسامه
- بابا .. يا بابا
= تعالي يا ملك انا في البلكونه مع عمك
- اهلاً بعمي اللي رفدني من الشغل
ضحك " الشغل شغل
- يعمو ده انا حتي بحبك
" طب م انا بحبك بس الشغل شغل بردو
- ماشي الشغل شغل .. انا مالي بقي بشغل الناس التانيه مكل واحد يخليه في شغله
" مش انتِ رفضتي ؟ خلاص
رُحت تاني يوم المستشفي وانا مقرره اجرب اخشله .. عرفت انه مش مجنون ولكن مجرد اضطراب نفسي مش اكتر .. خدت نفسي عميق ودخلت اوضته
- ازيَّك؟
قال بملل = اطلعي بره
- احم ايه الاحراج ده .. جبهتي يجدع
= انا قولت بره
- لأ بقولك ايه انا واقفه في ملك الحكومه
= خلصتي؟ بره
شديت الكتاب اللي بيقراه - كتاب ايه ده؟
= هاتيه يـ بني ادمه
- علي فكره مفيش حاجه اسمها بني ادمه .. بني ادم اصلاً معناها اولاد سيدنا ادم يعني هي جمع اصلاً .. انت خليتها مؤنث ازاي!
= ايه حصه العربي اللي انتِ فتحتيها دي!!
- كتاب ايه بردو .. اممم في قلبي انثي عربيه؟
= اسمها انثي عبريه مش عربيه يـ جاهله
ابتسمت - عارفه .. انا بنكشك بس .. ابقي ( وصال الروح ) حاجه كده جمدان
= انتِ مالك!!
- مالي في البانك بيشرب تانك وبياكل جبنه فلامنك
= ايه البيئه دي
- اومال انت فاكرني منين ؟ من المعادي ؟ ده انا من عزبه النخل يلا
= يلا؟ انتِ ازاي وافقوا يشغلوكي؟
- عمي صاحب المستشفي
= قولي كده بقي
قولت بأفتخار - والـ 7 سنين طب باخد امتياز
= شكلك بتكدبي
- اكدب مكدبش انا حره ، قولي بقي اسمك ايه ؟
= اسمي .. ايه ده انتِ مالك ؟ وبعدين انتِ لسه هنا ليه؟ انا مش قولت بره
قعدت ع الكنبه - ولا متعمليش صداع
= بره
- قولي بقي طفشت كل اللي دخلولك ليه؟
= كل اللي دخلولي ؟ انا دخلي 2 بس اساساً
- بجد؟ ماشي يعمي لما اشوفك
= اطلعي بره بقي
- هو انت مبتزعقش ليه؟
= افندم
- قصدي لما دخلت قولتلي بره بملل كده .. مش المفروض اخش الاقي الاوضه ضلمه وانت تزعق فيا جامد وانا اتخض ويغمي عليا وبعدين اصمم اعالجك وانت تحبني ونتجوز
= خلصتي الفيلم الهندي بتاعك؟
- ايوه
= اطلعي بره بقي
خرجت من الاوضه بكامل ارادتي .. ههه بهزر هو اللي طردني اصلاً .. روحت البيت بحثت عن افلام لـ كونان اخترت فيلم مش جديد اوي بس بحبه ونزلته
صحيت تاني يوم عديت ع السوبر ماركت وجبت حلويات كتير وازازه بيبسي .. وصلت المستشفي ودخلت مكتب عمي
- صباح الخير ، كدبت عليا ليه؟
= طب اديني فرصه ، كدبت في ايه؟
- قولت انه دخله ناس كتير وهو دخله 2 بس
= انتِ عرفتي؟
- مكونتش عايزني اعرف؟
اتنهد = مش الفكره .. الفكره حتي لو دخلت حد تاني .. هو رافض الفكره نفسها .. انا قولت انتِ مُختلفه
- ما علينا .. المهم
= قولي
- انا مش عايزه اي شغل الفتره دي
= بمعني؟
- يعني لحد م يتعالج مش هخش اي عمليات ولا هبقي مسؤوله عن اي حاله غيره
= بس انتِ عارفه ان ده صح
- معلش .. عشان اقدر اركز معاه .. غير كده ارفدني احسن انا مليش في جو الشغل ده
= خلاص خلاص ماشي .. موافق
- عن اذنك
دخلت مكتبي خدت اللاب توب بتاعي وشنطه الحلويات والتُرمس .. وخدت كمان ازاي معطر وعلبه فشار وكوبايات .. ونظراً لكل ده كنت بخبط ع الباب بدماغي اصلاً
فتح - خير .. ايه ده !! ايه كل ده!!
دخلت = يجدع دخلني كده بس الاول
- انتِ اوريدي دخلتي .. ايه ده بقي
= ده لاب توب
- بتهزري .. كنت فاكره طبق بطاطس
= كويس انا كنت فاكره طبق بمبار
- اخلصي ايه ده؟
= بص يا سيدي .. انا من عُشاق كونان فـ عملت ايه بقي .. نزلتله فيلم شوفته قبل كده بس جامد يعني .. وجبت الحاجات دي نتسلي فيهم
- نتسلي فيهم؟ كل ده!! ده لو هتسلي بلد مش هتجيبي كل ده .. وبعدين جايبه 2 تُرمس ليه ؟ هنشرب كل الشاي ده
= مفيهومش شاي
- اومال ايه؟
= واحد فيه شاي بلبن والتاني حمص الشام
- احنا هناكل كل ده!!
= ايوه
- ثانيه واحده انا اصلاً مش عايز اقعد معاكي ولا اتفرج ع حاجه
= عادي انا معنديش كرامه وهقعد بردو .. الاهتمام مبيطلبش يـ استاذ
قعد جمبي - انتِ مجنونه؟
= ليه؟
- انتِ هنا عشان تعالجيني .. جايه تفرجيني علي فيلم؟
اتنهدت = انا ولا دكتوره نفسيه ولا نيله .. الكار ده مش كاري اصلاً .. جو الاسترونج اندبندت وومان ده مش بتاعي اساساً بس قولت اشتغل عشان بحب شغلي لكن انا اصلاً عبيطه
ضحك - كنت عارف
= متشكرين يا رجوله
- طب مش المفروض تسأليني انا هنا ليه ؟
= انا مش مُقتنعه بالفكرة دي .. انت لو عايز تحكي كنت حكيت لحد من اهلك او واحد من 2 دكاتره اللي فاتوا .. وبعدين انا مش عايزاك تحس انك مُجبر
- مش المفروض متقوليليش كده وتخليني اثق فيكي عشان احكيلك تلقائي
هزيت كتفي = انا واضحه وصريحه .. ووقت م تحب تحكي هسمعك .. ولحد الوقت ده انت مش ملزوم تعمل اي حاجه نهائي .. يلا الفيلم هيبدأ
- ملك
بصيتله = اممم
ابتسم - شكراً
ابتسمت= العفو
قعدنا نتفرج لحد م لقيته اندمج مع الفيلم جامد .. ابتسمت وانا ببصله .. كان كل م يخلص كيس شيبسي او شيتوس يمد ايده وياخد واحد كمان .. وبعدين فتح البيبسي وصب لنفسه وليا .. كنت مبسوطه اني خرجته من القوقعه اللي كان حابس نفسه فيها .. واكتشفت انه بره القوقعه دي شكله قمر ❤!
تاني يوم صحيت بدري اوي ونزلت العتبه .. اشتريت شويه كُتب محترمين .. اينعم لفيت كتير بس مُش مهم .. خلصت وبعدين طلعت ع السوبر ماركت واشتريت شيتوس كتير لأني لاحظت ان دي اكتر حاجه كان بياكل منها امبارح .. وبعدين طلعت ع المستشفي
فتحت الباب - صباح الخير
ابتسم = صباح النور
- عامل ايه؟
= كويس
- عاملالك سربرايز
استغرب = سربرايز؟!
- اهه ، يلا غمض عينيك
غمض عينيه = اهو
حطيت الكتب ع الترابيزه - فتح
= بتهزري !! ده بجد!!
ابتسمت - لأ فوتوشوب
= رغم ان دمها تقيل بس مقبوله منك .. كل دول عشاني بجد؟
هزيت راسي - ايوه .. خدت بالي انك بتحب القرايه .. نزلت جبت كتب بحبها وفيه منهم مقرتهوش بس بيتهيألي حلو
= بس دول بتاع 10 كتب
- يعم خلصهم ونجيب تاني .. ايوه وخد الشيتوس ده
= كمان؟! عرفتي منين؟
- خدت بالي انها اكتر حاجه كلتها امبارح
= ده انتِ بتاخدي بالك من كل حاجه
ابتسمت - دي عاده فيا من وانا صغيره
ابتسم = شكراً حقيقي شكراً
- العفو ، انا هروح اظبط شويه اوراق واعمل شويه حاجات وهعدي عليك تاني كمان ساعتين
ابتسم = ماشي ، هستناكي
رُحت مكتبي وبدأت اعمل الاوراق اللي كانت متأخره عليا .. خلصتها في ساعه ونص وكنت لسه هروحله تليفوني رن
- الو
= الو يا ملك
- ايوه يا ريم .. اخبارك ؟
= فْل ، بقولك
- قولي
= احنا خارجين كمان نص ساعه كده رايحين نتمشي ع الكورنيش .. قولنا نقولك عشان عارفين انك بتحبي تروحي هناك
- بجد !! رايحين؟
= ايوه ، هتقابلينا فين؟
كنت لسه هتكلم افتكرت اني المفروض اروحله دلوقتي .. اينعم انا مواعيد شغلي خلصت بس انا اتفقت معاه .. بس انا بحب الكورنيش اوي .. غمضت عيني واتنهدت
- ايوه يا ريم ، مش هينفع النهارده
اندهشت = ايه؟
- ايه ؟
= انتِ ملك؟
ضحكت - ايوه ، بس بجد مش هينفع النهارده
= خلاص هنروح احنا ونبقي نظبط يوم تاني نروح اي حته تانيه
- خلاص ماشي ، سلام
= سلام
قفلت معاه وانا حاسه اني راضيه عن قراري .. كده احسن بكتير
- اتأخرت
ابتسم = لأ ، مواعيدك مظبوطه
قعدت جمبه - بتعمل ايه؟
= كالعاده بقرأ
- هو انت ايه مبتشغلش التليفزيون
= مبحبوش
- وانا كمان .. بتفرج ع كرتون بس
ضحك = جدعه
- انا بحب الكرتون اوي .. الحقيقه بحب حاجات كتير اوي اوي .. يعني فيه حاجات مُعينه بحبها بطريقه مُرعبه .. زي الكرتون وخاصه كونان و zotoopia والروايات خاصه وصال الروح وانت لي وبعينيك وعد .. بحب حمص الشام والجوافه بلبن والقصب .. بحب السمك اوي بكل انواع والجمبري والكابوريا والرنجه والفسيخ والملوحة واي حاجه طالعه من البحر بس اكتر حاجه فيهم هي شوربه الشي فود .. تقدر تقول دي اكلتي المفضله .. مبحبش الافلام اوي بس بعشق فيلم عمر وسلمي .. مليش في الاجنبي بس بحب Lucy .. واخيراً اكتر حاجتين بحبهم في الحياه هما الشاي بلبن والهوهوز .. لو عصروني كده هنزل شاي بلبن وهوهوز
ابتسم = انتِ لطيفه اوي
- احم شكراً
= لأ بجد لطيفه اوي .. واضحه وصريحة معايا من الاول .. اسلوبك هادي ومُريح وبتتعاملي ببساطه وسلاسه .. بتحبي حاجات غريبه بس بتبين قد ايه انتِ طبيعيه وهاديه .. روحك حلوه وده اللي مخليكي مختلفه
- اللهي تنستر
ضحك = وايه هي عيوبك بقي
- عيوب!! انا معنديش عيوب يبني انا قمر ههه بهزر معاك انا معنديش مميزات تقريباً
= لأ بجد ايه؟
قولت بتمثيل - عيبي اني طيبه ونيتي صافيه .. بص اي حد يقولك كده حربايه
ضحك = حصل اوي
- والله الواحده فيهم تبقي خاربه 50 بيت وتقولك عيبي اني طيبه .. لأ انا صريحه مع نفسي .. اكيد انا عندي عيوب .. بس بالنسبالي اكبر 3 عيوب فيا اني بارده وباخد بالتجربة وبعمل 100 حاجه في نفس الوقت ، اول حاجه البرود ده حاجه حلوه لأن العصبيه دي مش حاجه لطيفه .. بس انا بارده اوي .. يعني فيه مواقف الناس كلها تتأثر وانا ولا الهوا .. تاني حاجه اني لازم اجرب .. وده ساعات كتير اوي بيخسرني .. يعني مثلاً كلنا عارفين اننا لو حطينا ايدينا ع النار بنتحرق .. انا بقي لازم اجرب اشوف انا هتحرق ولا لأ .. ساعات كتير ناس بتحذرني من حاجه وانا اصمم عليها لمجرد اني عايزه اجرب .. بس الموضوع ده حالياً تقريباً شبه بطلته .. مبقتش اعمل كده الحمد لله .. تالت عيب وهو اني عايز اعمل كل حاجه في نفس الوقت .. مثلاً احفظ قرآن واتعلم انجليزي واكتب كتاب واذاكر واشتغل .. لكن المشكله دي كمان حليتها بعد م قدرت انظم وقتي صح .. يعني حالياً عيبي هو اني بارده
ابتسم = انتِ صريحه اوي وواضحه مع نفسك .. وده مخليكي اجمل
- احم شكراً
= بس مش شايفاها غريبه شويه
- هي ايه؟
= انتِ هنا الدكتوره .. وانا المريض ومع ذلك انتِ اللي بتتكلمي
هزيت كتفي - احنا متفقين انك وقت م تعوز تتكلم اتكلم .. و بعدين ولا انا دكتوره ولا انا مريض .. احنا هنا صحاب وبعدين انت اعقل مني اقسم بالله
ضحك = بس انا حابب احكي
- احكي
استغرب = مفرحتيش يعني
- وافرح ليه؟
= اني هحكيلك وتبقي نجحتي فـ اللي غيرك معملوش
- انا مش ببصلها كده .. ده مش مجالي اصلاً .. طالما انت هتحكي يبقي عشان نفسك .. انا مش عايزه اعالجك عشان ابقي ناجحه .. انا عايزه اعالجك عشان انت تخرج من هنا .. ده لو اعتبرنا انك مريض اصلاً وبعدين كلنا مرضي نفسيين بأختلاف الدرجات
= جاهزه تسمعي؟
- انا عارفه
= عارفه ايه؟
- حكايتك
اندهش = بجد
- ايوه ، الله يرحمها
اندهش اكتر = هي مين دي؟
- اختك
= اختي !!
- ايوه .. مش انت كنت عايش مع باباك ومامتك وليك اخ واخت .. وبعدين فيه مره فيه ناس اغتصبوا اختك وهي انهارت فـ انتحرت .. راح باباك مستحملش الصدمه وجاله جلطه ومات ومامتك مستحملش موت باباك فماتت وراه واخوك انحرف وشرب مخدرات وانت حياتك اتدمرت .. قلبي عندك والله
اندهش = ايه كل الفيلم الهندي ده !! جبتي الكلام ده منين؟
- من الروايات .. كل الروايات بيحصل فيها كده
= يلهوي ع العبط اللي انتِ فيه ، ربنا يعينك علي المهلبيه اللي في دماغك دي
- يعني دي مش قصتك
= لأ
- اوعي تقول انك وحيد باباك ومامتك وحبيت بنت وهي خانتك فـ مستحملتش وحاولت الانتحار فـ جت هنا
= ملك .. تعرفي انك تنفعي كاتبه افلام هابطه .. اللي هي بتتعرض تحت بير السلم دي
- اومال ايه اللي حصلك
= انا يا ستي وحيد بابايا ومامتي و
قاطعته - زي م قولت اهو
= تعرفي تسكتي؟
- احم كمل
= كنت بشتغل في شركه كبيره .. وكنت من اشطر المهندسين فيها وليا اسم كبير .. لحد م فيوم حد لبسني تهمه سرقه تصاميم الشركه والكل صدقه واترفدت .. حاولت اقدم في كذا شركه تانيه بس الكل بيرفضني بسبب اللي حصل .. دخلت في اكتئاب لأني بحب شغلي جداً وحسيت اني منبوذ .. اهلي جابوني هنا عشان اخرج من الحاله اللي انا فيها .. بس هو ده اللي حصل
- يعني الحوار ده كله عشان اترفدت؟
= ايوه
- يجدع !! ده انا عمي بيرفدني مرتين في الاسبوع
ضحك = يبنتي بقي
- اه والله ، وفي الرايحه والجايه بتهزق
= انتِ نكته
- وانا اللي افتكرت بتموت جواك وبتبكي ع حالك وفي الاخر تطلع دي الحكايه ، اومال فين العُقد اللي بتبقي ابطال الروايات دي
= ملك
- نعم
= اطلعي بره
عدي اسبوع ع الحال ده .. هو معندوش اي مُشكله غير انه فقد شغفه .. خسر شغله اللي بيحبه واللي ناجح فيه .. لكن غير كده فـ هو قمر ❤!
- صباح الخير
= صباح النور
- اخبارك؟
= كويس
- امم والدنيا عامله ايه؟
ضحك = كويسه ، قولي عايزه تقولي ايه؟
- انا !! انا مش عايزه اقول حاجه
= ملك .. قولي اللي انتِ عايزه تقوليه
- احم جايبالك خبر حلو
= ايوه ايه هو بقي
طلعت ورق من ورا ضهري - سربراااااايز
= ايه ده مش فاهم
- من اسبوع لما انت حكيتلي اللي حصل .. جبت عنوان الشركه اللي انت كنت شغال فيها وروحت هناك وطلبت اني اشوف شرايط المراقبه
= وهما اكيد رفضوا
- لأ احم م انا قولتلهم اني ظابط
= وهما صدقوكي ازاي؟!
ابتسمت بشر - م انا زورت كارنيه
= زورتي !! فيه دكتوره تعمل كده؟
هزيت كتفي - مش انا عملت .. يبقي فيه ، المهم اني جبت الشريط اللي كان زميلك بيسرق فيه ملف التصاميم وبيحطه في مكتبك و وريته لمدير الشركه اللي اتصدم .. المهم اني ساعتها بلغت البوليس بجد عشان يقبضوا ع زميلك ده .. المدير قعد يتحايل عليا اني اقنعك ترجع الشغل بس انا رفضت عشان يبقي يقدر قيمه النعمه الاهبل ده ، وقدمت ورقك في شركه اكبر وقبلوك في منصب اكبر كمان ، ها ايه رأيك. ؟
= انا .. انا مش مصدق
ابتسمت - لأ صدق .. انت تستاهل كل خير .. انت اصلاً مكانك مش هنا .. انت مغلطتش في اي حاجه غير انك استسلمت لليأس والاكتئاب .. يمكن كل ده حصل عشان تتعلم بما تقع تقوم
= ملك .. انا .. انا مش عارف اقول ايه؟
- متقولش حاجه .. ودلوقتي اجهز عشان هتخرج من هنا مع باباك ومامتك بليل
= خلاص كده هخرج؟
- ايوه .. خلاص انت خرجت من حاله الاكتئاب اللي كنت فيها .. انت زي الفُل دلوقتي
= طب بقولك ايه؟
- بما اني معملتلكيش اي حاجه من الروايات اللي في دماغك ولا زعقت فيكي اول مره دخلتي ولا طلعت مُعقد ولا حياتي متدمره وبوظتلك الفيلم الهندي فـ انا هحاول ع الاقل اعمل النهايه زيهم
= مش فاهمه
- باباكي فاضي بكره الساعه 7 ؟!
= ايوه بس ليه؟
- هنيجي بكره انا وبابا وماما
= ليه بردو
- ولا حاجه هنلعب ماتش كوره
= لأ بجد ليه؟!
- اصل انا عندي روايات كتير اوي في بيتي .. مش عايزه تقريهم معايا ؟
لو أنّ الحب كلمات تكتب لانتهت أقلامي، لكنّ الحبّ أرواح توهب، فهل تكفيك روحي؟❤
#سَكَن_الروحِ
#حواديت_ملك
#ملك_ابراهيم ❤!!
كداخلصت الروايتنا 👍
متنسوش التفاعل ورأيكم لو الروايه عجبكم.....♥️
⚡#رايك_في_كومنت_يفرحنى⚡
علقي ب20 ملصق وأعملي #متابعة لحسابي ليصلك كل جديد 👈👈 #ماجدفادي 👉👉
عشان يوصلك احلى القصص متكتبش تم وتجري🏃♀️ أعملي #متابعة لحسابي اوطلب صداقه ليصلك احلى واجمل القصص مفاجأة من العيار الثقيل 🤺 افضل القصص والروايات 👌ونتظرونافي قصه جديدة
تعليقات
إرسال تعليق