اسكربت كامله. تفاعلوووووو يا قمرات
- كده الحساب كام؟!
= كده الحساب كله 58 جنيه
- حط واحده هوهوز كمان ويبقوا 60
= بس مش كده كتير يا بنتي
- كتير ايه؟!
= انتِ واخده بـ 60 جنيه هوهوز بس !!
- يراجل حط حط .. بنعيش كام مره يعني
خدت شنطت الحلويات بتاعتي وطلعت قعدت ع البحر .. الواحد لازم يستغل كل فينتو ثانيه هنا في المصيف .. اينعم بابا هيهزقني عشان مبطلعش الشاليه بس كده كده انا مهزقه فـ مش مهم
اخترت ديسك من اللي بيبقوا محطوطين دول قريب من البحر .. حطيت جمبي ترمس كبير يكفي بتاع 6 افراد .. بس فـ الحقيقه هو ليا انا بس ومليان شاي بلبن .. حسبي الله فيا بجد ع اللي انا بعمله ده .. فتحت الشنطه البلاستيك اللي معايا وطلعت واحده هوهوز من السبعتلاف واحده اللي في الكيس .. هو لو مكانش فيه شاي بلبن وهوهوز كنّا هنعيش ازاي ؟!
- مش تحاسب يا اخي
اتكلم بهدوء = انا اسف مقصدتش
- مقصدتش ايه بس ده انت غرقتني !! سيادتك اعمي يعني ولا ايه!!
= يمكن
- ايه؟!
= زي م انتِ قولتي .. اعمي
اتحرجت - احم انا اسفه بس انا انسانه غبيه اوعي تاخد ع كلامي
حرك راسه بهدوء = حصل خير .. انا مكنتش اعرف انك قاعده هنا .. وخصوصاً انك مكنتيش عامله اي صوت
- حصل خير .. كده انا اتطمنت
استغرب = اتطمنتي؟!
- ايوه اصلي كنت مستغربه بصراحه
قعد = مش فاهم
- يعني طول بعرض بعينين ملونه وشعر ناعم اكيد يعني مش هيبقي عندك كل حاجه .. بسم الله ماشاء الله احنا مبنقرش
ضحك = اومال لو كنتي بتقري !!
- ايوه يجدع اضحك كده محدش واخد منها حاجه ، عندك انا مثلاً قاعده بشرب شاي بلبن واتفرج ع البحر وانا اول م هروح بابا هيقولي قد ايه انا عاله ع المجتمع وانه مخلفش غير فرح وبيري واني عمله الاسود
ابتسم = بتحبيه؟!
- جداً .. اكتر شخص في حياتي .. بعد وفاه ماما هو بقي المحور اللي حياتي كلها بتدور فيه .. عارف لو بطلت اتهزء ؟! هشك انه بطل يحبني
= ربنا يخليكم لبعض
- يارب
= طبعاً انتِ دلوقتي عايزه تسأليني عن والدي بس خايفه انك تعكي الدنيا؟
- الصراحه اه وانا اصلاً موهوبه في حوار اني اعك الدنيا ده
= لا يستي متقلقيش .. بابا وماما الاتنين عايشين الحمد لله .. وبيحبوني اوي وخصوصاً لأني ابنهم الوحيد
- هما معاك هنا؟!
= ايوه .. هما جايين اصلاً عشان يخلوني اغير جو بعد الحادثة
- احم الف سلامه عليك
ابتسم = الله يسلمك .. مش محتاجه تتوتري اللي حصل حصل خلاص
= هي كانت قريب ؟!
- من شهرين بس .. حادثه عربيه
= مفيش علاج ؟!
- عمليه .. فيه عمليه
= لا لا متقولش .. انت رافض العمليه واهلك بيحاولوا يُقنعوك وانت رافض عشان متعلقش نفسك بوهم وهما هيدوروا ع البنت اللي انت بتحبها عشان تقنعك تعمل العمليه؟! انا عارفه الحوار ده اتعمل في روايه كبرياء اعمي ع فكره .. روايه جامده ابقي اقراها
ضحك - ايه الهيلاهوبا اللي انتِ فيها دي .. لا يبنتي عادي انا موافق ع العمليه وهعملها كمان شهر وجاي اغير جو مش اكتر
= ايه ده بجد؟! ببساطه كده
- ايوه
= مفيش اكشن ولا اهلك هيكدبوا عليك ولا اي حاجه
- لأ خالص ، بس معلش عندي سؤال .. هو ايه اللي روايه جامده ابقي اقراها .. انتِ بتعايريني يعني ولا ايه؟!
= اقسم بالله ما اقصد انا ...
ضحك - عارف عارف .. بعد الهيصه اللي انتِ قولتيها دي مصدق انك عبيطه عادي
= طب الحمد لله
- الحمد لله انك عبيطه؟!
= لأ الحمد لله انك مصدقن... ايه ده انت قولت اني عبيطه ؟!! عمتاً ربنا يسامحك الشتيمه بتلف تلف وترجع لصاحبها
- طب يستي شكراً كفايه
مديت ايدي في الشنطه = اتفضل .. دي كيكه حلوه وانا بحبها .. ع فكره انا مبديش لأي حد منها حتي اخواتي .. عشان تعرف بس .. يلا انا همشي بقي
ابتسم - اتفضلي ، انتِ قاعده هنا قد ايه؟!
= اسبوع لسه
- انتو لسه جايين امبارح؟!
= ايوه
- معانا
ابتسمت = معاكو .. شكلنا هنتقابل تاني
سبته ومشيت .. ياربي احنا مشوفناش لُطف كده قبل كده
- بابا ... باااااباااااااا
= هو انتِ علطول بتزعقي كده؟!
حضنته - مش بنادي عليك يا قره عيني
= يارب عوض عليا عوض الصابرين .. كنتي فين؟!
- ع البحر
= بس؟!
- يعني ايه بس؟!
= يعني مروحتيش فـ حته قبل البحر؟!
- لأ مروحتش
= ملك
- اوكااي روحت للسوبر ماركت اشتريت حاجه حلوه
= قصدك اشتريتي هوهوز بس
- يابن اللعيبه عرفت منين؟!
= مش مهم اعرف دي .. المهم بقي جبتي بكام؟!
اتوترت - هكون جبت بكام يعني .. شويه قليلين متقلقش
= ملك
- يا بابا انا جايباهم من فلوسي اصلاً
= هي هتفرق فلوس مين ؟ المهم بكام؟
غمضت عيني وقولت بسرعه - 60 جنيه
= كاااااام !!
- ايه يا بوب مالك في ايه؟!
قعد ع الكرسي = يارب انا عملت ايه عشان اخلف واحده زي دي
- حسنات .. عملت حسنات كتير اوي
= و جبتي بـ قد ايه لبن النهارده كمان
ابتسمت بسماجه - 30 جنيه
= تعرفي يا ملك .. انا لو كان عندي جاموسه كانت هتفيدني عنك .. ع الاقل هي هتجيبلي لبن انتِ بتشربيه
دخلت اوضتي بعد م بابا صالحني ههه بهزر انا اللي صالحته .. والله لو هشحت كده محبش الا هو .. جبت اللاب توب بتاعي وشغلت فيلم للمحقق كونان .. خدت بيتزا من التلاجه وسخنتها وطلعت البلكونه .. شغلت الفيلم وقعدت اتفرج عليه
بعد شويه بصيت ع البلكونه اللي جمبي .. هو مش المفروض ساكن هنا ؟! وبعدين يطلع ونقعد نتكلم لحد الصبح ؟! وتبقي صدفه عجيبه غريبه فظيعه مفيش منها اتنين !! جماعه هي الروايات مش شغاله معايا ليه ؟!
- يلا يا ملك قومي
قولت بنوم = حاضر هقوم اهو
- يلا يبنتي
= طيب طيب
- يلا عشان فيه ضيوف جايين
= ضيوف؟! في المصيف !! انا عارفه ان حد باصصلي فين المصيف ده
- قومي يلا اخلصي .. ده واحد صاحبي عرفت انه هنا صدفه فـ قولتله ييجي يتغدي معانا
= حاضر هقوم اهو
قومت غيرت هدومي وطلعت .. استنينا شويه لحد م صاحب بابا جه هو وابنه .. وزي ما توقعتهم .. كانوا ناس اول مره اشوفهم عادي ولا طلع هو ولا اي نيله .. جماعه انا الاسكريبتات والروايات مش شغاله معايا ليه ؟! فوقي بقي فوقي بقي
ربع ساعه واستأذنت ومشيت .. خدت موبايلي والسماعه ونزلت .. قعدت اتمشي في القريه لحد م قررت اروح البحر .. مكانش فيه حد غيري بحكم ان الساعه 8 والدنيا ضلمه خالص .. حطيت السماعات وقعدت ع الرمله وغمضت عيني
ليه مينفعش حياتنا تكون بسيطه كده .. كل حاجه ممكن نحلها بـ تمشيه او كوبايه شاي بلبن .. او اننا نقرأ كتاب .. ليه حياتنا مُعقده ؟!
- عندها جناحات امسكها تطير
= غاويه الترحال وانا نفسي طويل
لفيت - هاي .. انت هنا ؟!
ابتسم = لأ هناك
- وحشه
= عارف ، قاعده هنا ليه؟
- بابا قاعد مع واحد صاحبه وانا الصراحه معرفوش ومليش خُلق اعرفه .. ومعاه ابنه عيل سمج كده فـ مشيت بعد ربع ساعه
= كل ده وقعدتي ربع ساعه ؟ اومال لو كنتي قعدتي معاهم للاخر كنت هتدعي عليهم ولا ايه؟
- قصدك اني شريره؟
= مش قصدي بس
قاطعته - لأ معاك حق انا شريره فعلاً مش هزار
ضحك = ردود افعالك اكتر تاني حاجه غريبه قابلتها في حياتي
- ايه اكتر حاجه غريبه قابلتها؟
= انتِ
- انا مُحتله اول 3 مراكز في الاستغراب عندك ولا ايه
= شكلك كده
- انت عرفتني منين؟
= من صوتك .. صوتك كان مسموع شويه وانتِ بتغني
- بتحب الاغنيه دي؟
= ايوه .. وانتِ؟
- بحبها .. بس بسمعها من غير موسيقي .. يُفضل انت كمان تعمل كده
ابتسم = بعمل كده
- انت 1 وانا 0 .. كبستني وخليت شكلي وحش .. طب يا سيدي شكراً كفايه
= ايوه صح بالمناسبه .. انتِ شكلك ايه؟
- مارلين مونرو .. مفيش جمال كده بعد كده .. ولا الاجانب .. ده انا عيني لونها ازرق اجمد من البحر
= بجد؟!
- لأ طبعاً بكدب .. انت صدقتني؟! لون عيني بُني عادي .. انت فاكر كل الناس عيونهم ملونه واجانب زيك .. فيه ناس حظهم غريب
= انتِ حظك وحش عشان عينك مش ملونه
- لأ مش وحش .. انا بحب لون عيني اوي اوي .. لايق اصلاً ع ملامحي .. بس الحظ ساعات بيبقي غريب .. ماما الله يرحمها عينيها بُني .. وبابا عينه خضرا .. خلفوا 3 بنات عينيهم بُني
ضحك = محدش خد عين باباكي ؟
- لأ .. بس عارف ؟ لون عيني جامد اصلاً
= يمكن ميكونش حلو اوي .. بس طريقه كلامك عنه مخلياه احلي
ابتسمت - يمكن .. هتكون هنا بُكره ؟!
ابتسم = هكون هنا بكره
احياناً محتاجين حد يسمعنا .. ساعات مش بنحتاج نشوف اللي قدمنا .. يمكن لو لقينا حد يسمعنا بس هنقدر نشوفه .. نشوفه بقلبنا ❤!!
- هالوو
= هالو؟ دي اللي هي hello يعني ؟!
- انا المفروض متكلمش انجليزي تاني .. عايز الصراحه ؟! انا المفروض متكلمش تاني عمتاً
= انتِ بتقولي كلمه عمتاً كتير ولا انا بيتهيألي؟!
- لأ دي حقيقه .. اما بقولها كتير فعلاً ومش عارفه ليه .. مش مهم اعرف اصلاً مش هستفيد حاجه
= مش مهم اصلاً؟! ده انتِ في المهلبيه
- يعم مهلبيه مهلبيه .. خد السماعه دي البسها
= والله يا ملك مش عارف اجيبهالك ازاي بس انا اكيد مش شايف السماعه يعني
- المفروض اديهالك؟!
= لو مش هنضايق سيادة الوزيره
اديتهاله - انا مش عارفه البشرية من غيري كانت هتحل مشاكلها ازاي
= البشرية من غيرك مكانش هيبقي عندها مشاكل
- طب يا سيدي شكراً كفايه
= احنا هنسمع ايه؟!
- الف ليله وليله الحلقات السماعيه .. انا بحب الف ليله وليله اوي .. قريتلها كُتب كتير كمان .. بس المسلسل السماعي مسمعتوش كله .. فـ نقعد نسمعه سوا
= اختارتي مسلسل سماعي عشان نبقي زي بعض ؟!
- لأ اختارته سماعي عشان متسألنيش اي اسئله وانا عندي صداع
= قومي من جمبي يا ملك
- جري ايه يجدع بهزر معاك .. يلا اسكت بقي عشان هشغل الحلقه
= اتفضلي يختي
احنا كـ بشر بسيطين جداً .. بنحب اللي يحبنا .. بنحب اللي يتعامل معانا ببساطه ومن غير تجميل .. اللي يحبنا بطبيعتنا .. بعيوبنا من غير م نخفيها .. ببساطه شديده بنحبه ❤!
- الاسبوع خلص بسرعه
= جداً ، هشوفك تاني؟!
ابتسم - انتِ ممكن تشوفيني .. انا لأ
= انا بتكلم بجد .. هنتقابل تاني ؟!
- مين عارف
= خلي بالك من نفسك
- وانتِ
رجعت القاهره بعد م اسبوع المصيف خلص .. اغرب مصيف ممكن يعدي عليا في حياتي .. يا تري هشوفه تاني ؟! يا تري هنتقابل تاني ؟! هو انا ايه مخدتش رقمه !! او عنوانه او اي حاجه توصلني ليه !!
- يلا يا ملك ميعاد شغلك
= مش قادره انزل النهارده
- ياحبيبتي احنا راجعين بقالنا اسبوع وانتِ لحد دلوقتي منزلتيش شُغلك
= حاضر يا بابا هقوم اهو
انا فقدت الشغف .. اناااااا فااااااااقده الشغغغغغغغف
- صباح الخير
= صباح النور
- حمدالله ع السلامه ، مجيتيش ليه من ساعه م رجعتي ؟!
= كنت فاقده الشغف
- فاقده الشغف ؟!
= ايوه .. بقولك ايه بالله عليكي تبعتي حد يجيبلي هوهوز
- قومي عدي ع المرضي يا ملك تخلصي
= طب اعملولي شاي بلبن طيب
- ملك !!
= قايمه قايمه خلاص
قعدت الف شويه في المستشفي بلا هدف .. انا عايزه اخبط دماغي في الكولدير ده ويحجزوني في اي اوضه هنا .. او امسكني كده ارميني في اي اوضه .. زي اوضه الواد الحلو ده
قعدت 5 ثواني استوعب انا قولت ايه !! بصيت تاني ع الاوضه .. كان قاعد وبيضحك .. بيتكلم وعينه بتلمع .. عينه !!
- دكتور دكتور ياااا دكتوووور
= حمد الله ع السلامه يا ملك
- الله يسلمك .. بقولك ايه الحاله دي ؟
قال بأستغراب = ليه؟!
- جاوبني بس
= ده كان عامل حادثه اثرت علي عينه ومبقاش يشوف .. لكن اول امبارح عمل عمليه وفتح تاني
- شكراً .. شكراً جداً
فتح !! يعني هو دلوقتي بيشوف !! يارب اول مره صُدف الروايات تظبط معايا .. شوفت باباه ومامته خارجين من الاوضه .. خدت نفس عميق وروحت هبطت عليه
- اتفضل
قولت بصوت واطي = حمدالله ع السلامه
- الله يسلمك
غيرت صوتي شويه = انا دكتوره هنا وقولت اعدي اطمن عليك
ابتسم - انا كويس الحمد لله
= طب محتاج حاجه؟!
- لأ شكراً
= عن اذنك
خرجت وانا متوتره .. عينيه حلوه بشكل .. وهو بيتكلم بتلمع كأنها زمرد .. خدت موبايلي وخرجت اقف في جنينه المستشفي .. مديت ايدي وسندت ع السور .. شافني !! حتي لو مش عارف بس شافني !!
قولت بصوت هامس - عايزين يعرفوا حبيتك ليه؟! ييجوا يشوفوا
= القمر اللي سلامه بعينيه مش بكفوفه
لفيت بسرعه - احم انت عايز حاجه
سند ع السور جمبي = انتِ
- افندم؟
= فاكره لما قولتلك انك عبيطه ؟! دلوقتي انا بأكدلك المعلومه
- احم عرفتني منين؟!
ابتسم = عايزين يعرفوا حبيتك ليه ؟! ييجوا يشوفوا .. القمر اللي سلامه بعينيه مش بكفوفه
= بمعني ؟
- عينيكي .. صوتك كان مألوف بالنسبالي بس عينيكي كانت بتلمع .. فاكره لما قولتي انك بتحبي عينك اوي ؟! انت كمان بحب عينك اوي
حاولت اغير الموضوع = دلوقتي بقيت مُميز
- بمعني؟!
= الاول كنت طول بعرض بحلاوه بس مش بتشوف .. دلوقتي بقيت اللهم صلي ع النبي
ضحك - بُتقري ؟!
= يسيدي بسم الله ما شاء الله احنا مبنقرش
- بس لعلمك انت مش كامل .. ناقصني حاجه
= حاجه ايه؟!
- انتِ .. تتجوزيني؟!
= حد يخض حد كده ؟!
- ملك !!
= موافقه بس ليه؟!
- يعني شكلك حلو وروحك حلوه .. تتحبي بسرعه .. بسيطه وتدخلي القلب علطول
= بُتقر ؟!
ضحك - بسم الله ما شاء الله احنا مبنقرش
لو أنّ الحب كلمات تكتب لانتهت أقلامي، لكنّ الحبّ أرواح توهب، فهل تكفيك روحي؟❤
#سَكَن_الروحِ
#حواديت_ملك
#ملك_ابراهيم ❤!!
كداخلصت الروايتنا 👍
متنسوش التفاعل ورأيكم لو الروايه عجبكم.....♥️
⚡#رايك_في_كومنت_يفرحنى⚡
علقي ب20 ملصق وأعملي #متابعة لحسابي ليصلك كل جديد 👈👈 #ماجدفادي 👉👉
عشان يوصلك احلى القصص متكتبش تم وتجري🏃♀️ أعملي #متابعة لحسابي اوطلب صداقه ليصلك احلى واجمل القصص مفاجأة من العيار الثقيل 🤺 افضل القصص والروايات 👌ونتظرونافي قصه جديدة
تعليقات
إرسال تعليق