كوكي وحماتها
كوكي وحماتها بقلم عزة كمال
كوكي وحماتها بقلم عزة كمال احتفاليه الاقلام الذهبية
- صباح الخير يا حماتي.
- حمى لما تجيلك انا مش قلت لك 100 مره يا بنت انت ما تقوليش يا حماتي، انا بكره منك الكلمه دي وبتعفرت لما بشوفك.
- خلاص اقول لك يا ماما.
- تك مو مش قلت ليكي ما تناديش بماما، هو انا خلفتك علشان تقولي لي يا ماما.
- طب اقول لك ايه يا خالتي.
- استغفر الله العظيم خوت لما يخوتك خالتك منين يا بنت انت يا ملزقه، هو انا كنت اخت امك وما اعرفش.
- طب اقول لك ايه ولا عاجبك ماما ولا عاجبك خالتي ولا حماتي.
- قولي ليا يا هانم.
- نعم هانم هو حد قال لك اللي شغاله هنا في ايه بالظبط.
- هو كده يا غاليه قولي لي يا هانم، وعلى الله اسمعك تقولي حاجه غيرها.
- طب إيه رأيك ادلعك واقول لك يا فوفا.
- بنت انت فوفا مين هو انت كنت صاحبتي عشان تدلعيني، هو تقولي لي يا هانم غير كده ما اسمعلكيش حس يلا أمشي من وشي.
- طب بقول لك ايه اعمل لك فطار ولا اعمل لك لبن.
- ليه كنت فاكراني هستناك لما تقومي يا غندور عشان تعملي لي كوبايه اللبن .
- خلاص يبقى اروح احضر الفطار.
- انت يا بت اقفي قصادي.
- في ايه تاني.
- هو انت سألتيني هفطر ايه ولا هتروحي تعمليه من دماغك.
- اكيد يعني حعمل الطبيعي جبنات مربى بيض.
- استغفر الله العظيم بنت قليلة الذوق ما تفهمش في الاصول، لا أنا مش عاوزه الأكل ده .
- أمال عاوزه تأكلي إيه فهميني.
- أنا عاوزه أكل فسيخ.
- نعم أجيب منين فسيخ دلوقتي.
- ماعرفش اتصرفي يعني أمك لو هي إللي كانت طالبه الفسيخ ما كنتيش هتجيبي ليها.
- أجيب فسيخ منين دلوقتي ده لسه الساعه 10:00، وما فيش عندي حاجه حتى باقيه من العيد، اصبري على الظهر هلبس وانزل اجيب لك اللي انت عاوزاه.
- نعم نعم عاوزاني أقعد لغايه الظهر ما أنا لو كنت أمك كنت حضرت الفطار وجبتيه ليا، ولو كنت مهتمة كنت عرفت من قبلها بيوم أنا عاوزه أكل أيه تاني يوم.
- خلاص خلاص حتصل بمحمد وأنزل أجيب لك الفسيخ.
- أه روحي اتصلي بيه وعطليه وقولي له أصل أمك السبب هي إللي طالبه الحاجه، طبعا بقى هو يسيب الشغل ويقعد يستنى حضرتك عقبال ما ترجعي.
- طب أنت عاوزه إيه دلوقتي وله عاوزه تأكلى حاجه من البيت وله عاوزاني انزل أجيب الحاجه، أنا أعمل لك إيه، طب اتصلي بالراجل يجيبه لك دليفري.
- ومين هيدفع الفلوس يا غندوره مش ابني، اه ما هو مش فلوس تعبانه فيها ابن يشقى وأنت بتضيعي تعبه.
- طب أنا أعمل ايه طب، أقول لك أنا اقعد وأسكت خالص شوفي أنت عاوزاني أعمل إيه وقولي لي وأنا أقوم اعمله.
- خلاص أنا حتصلك بمحمد واقول له هاتي تليفونك بقى.
بتتصل بمحمد
- أيوه يا محمد، لا لا يا حبيبي ده انا أمك يا غالي فوفا روح قلبك، لا يا حبيبي لا ما فيش حاجه اطمن بس هي بس كوكي كانت عاوزه تنزل تشتري فسيخ، والله يا ابني انا قلت لها الأكل كثير في البيت وبلاش تتعبي وتنزلي تجيبي حاجات على الفاضي بس هي صممت، وقالت لازم انزل اجيب فسيخ يا ماما نفسي في، اه يا حبيبي اه ماشي خلاص هقول لها، اطمن يا حبيبي اهم حاجه عندي أن أنت تكون بخير يا حبيبي ما تشغلش دماغك أنا أي حاجه باكلها وكل حاجه بقول نعمه ورضا.
كوكي: هو أنت ما قلتلهوش ليه إللي أنت عاوزه الفسيخ مش انا.
فوفا: نعم يا أختي عاوزاني أنا أقول له أنا إللي عايزة عشان يبقى يقول أمي مش بتبطل طلبات وكل شويه قاعده بتطلع ب 100 حاجه، لا يا حبيبتي أنا قدام ابني أبان أنا إللي كويسه، أما أنت ما تهمنيش يلا بقى البسي وأنزلي جيبي الفسيخ.
كوكي لبست وهي نازله لقت محمد بيتصل بيها فردت عليه يا حبيبي انا مش زعلانه، لا أنا عارفه أن أنت فاهم مامتك لا متشغلش دماغك انا مش زعلانه والله هي زي والدتي واعمل لها إللي هي عاوزاه كفايه حنيتك عليا، لا هشتري الفسيخ وأرجع على طول مش رايحه في حته عشان تلحق تفطر، لا ما تجيبش أكل من بره الغداء أنا حعرف أجهزه ما تجيبش حاجه من بره ما تخافش انا بخير.
فوفا وهي قاعدة البلب يخبط
فوفا مين اللي بيخبط علي الباب ما يكونش حرامي: انت يا حرامي يا اللي بتخبط على الباب ما فيش حاجه عندنا تتسرق،
كوكي: يا ماما أنا كوكي افتحي بقى ربنا يراضيك الاسانسير عطلان وطالعه على رجلي.
فتحت الباب
فوفا: إيه ده هو أنت أنا نسيت أن أنت نزلتي، كنت بتعملي ايه تحت انت اكيد كنت نازله تجيبي حبه حاجات تافهه.
كوكي: هو أنت مش طلبتي مني أجيب فسيخ.
فوفا: آه نسيت ما طبعا من وجع الدماغ إللي أنت عاملاه له كل يوم لازم أنسى، يلا ادخلي بقى جيبي لي الطبق وهاتي الاكلة ليا، جبتي بصل.
كوكي: أه وجبت كل الحاجات بتاعتها.
فوفا: ماشي يلا هاتي الأكل وتعالي.
جابت كوكي الأكل وحطته
فوفا: أنت يا بت رايحه فين.
كوكي: إيه يا ماما حقعد أكل معاكي في حاجه.
فوفا: أنا قلت لك اقعدي كلي معايا، هو أنت إللي طالبه الفسيخ ولا أنا، يلا عندك ياما الجبنه جوه روحي كلي، اما الفسيخ ده بفلوس ابني انا اللي حأكله يلا بقى روحي كلي في المطبخ عشان انا مش ناقصه وجع دماغ.
فوفا اكلت الفسيخ ودخلت نادت على كوكو جت تشيل الاكل واختفت كوكي في المطبخ، ما ظهرتش إلا ومحمد بيفتح الباب محمد: السلام عليكم إيه يا ماما عامله إيه، أمال فين كوكي.
فوفا: ما اعرفش يا أخويا من ساعه ما دخلت المطبخ ما طلعتش منه خالص حتى كوبايه الشاي ما عملتهاش.
كوكي بتبص لمحمد من على باب المطبخ وبتشاور له محمد فهم قال لها: ممكن عشان بتحضر الأكل يا ماما عشان انا قلت لها جاي بدري.
فوفا: يعني هي كوبايه الشاي بتاعتي إللي كانت هتعطلها.
طلعت كوكي وقالت: طب ما انا جبت ليكي حاجه ساقعه وأنت إللي طالباها مكان كوبايه الشاي.
فوفا: كويس يا ست الغندوره اشمعنى دلوقتي طلعتي من جحرك.
كوكي: يا ماما ارحميني بقى انت كل يوم مناكفه فيا.
فوفا: أنت يا بنت أنا قلت لك إيه.
كوكي: خلاص خلاص فهمت مش قائله لك يا ماما اقول لك يا هانم.
محمد بتعجب: هانم طب ما تقول لها فوفا.
فوفا: لا ما تقوليش يا فوفا هي مش صاحبتي ومش بنتي عشان تقول لي يا فوفا ويلا بقى روحي حضري الغداء عشان خلاص جوعت.
كوكي: حاضر ثواني والاكل حيتحضر.
حضرت كوكي الأكل ولسه حتقعد
فوفا: رايحه فين.
كوكي: حقعد أكل معاكم.
فوفا: لا أنت عارفه أن أنا مش بعرف أكل قدام حد غريب.
كوكي: ارحميني بقى لي اكتر من ست سنين معاك وكل يوم نفس الموال مش بنخلص يا ستي انا مش غريب أنا مرات ابنك وام حفيدك.
فوفا: حفيد مين إللي أنت وديتيه عند أمك يبات عندها.
محمد: يا ماما ما هو الولد بقى له اكثر من شهر ما راحش هناك، وكوكي متنفعش تسيبك عشان انت تعبانه اليومين دول فهو راح عند امها عشان الدوشه اللي بيعملها وانت تبقي مرتاحه.
فوفا: ماشي خليها بقى تدخل تأكل في المطبخ، مش هتاكل معانا برده أنا مبحبش أكل قدام حد مش بحبه.
محمد: خلاص يا كوكي خدي الأكل بتاعي وبتاعك ناكلوا مع بعض جوه.
فوفا: بت سيبي أكل الولا هنا الولا مش هيروح يأكل في المطبخ أنت فاهمه، وأنت يا أخويا زعلانه على زعلها ومش مهم أمك إللي شالتك في بطنها تسع شهور وتعبت عليك.
محمد: يا ماما طب سيبيها تأكل معانا النهارده بس ومش هتكررها ثاني، إزاي تدخل تأكل في المطبخ طب اقول لك تأكل تحت السفره.
فوفا: لا عشان بحب افرد رجلي.
محمد: طب خلاص يا كوكي اقعدي في ظهر ماما علي الترابيزه وكلمه زياده حتتنطق دلوقتي مشي واسيب ليكم البيت وأنزل أقعد على القهوه.
فوفا: ارتاحتي أه إبني من كتر قرفك وزنك عليه حينزل ويسيب لك البيت ويقعد على القهوه وان شاء الله يشوف عروسه ويتجوز عليك.
محمد مغير الموضوع: تسلم ايدك يا كوكي على الأكل التحفه ده.
فوفا: الأكل طعمه دلع والصلصه مش متسبكه، أه ما هي مش بتعرف تطبخ يلا مش مهم بقى نأكل علشان نجبر بخاطرها ما الواحده لازم تعامل مرات ابنها زي بنتها.
محمد: أنا الحمد لله خلصت أكل هدخل أريح جوه تعالي يا كوكي عاوزك.
فوفا بتبص لكوكي وتقول: روحي يا أختي وراه روحي.
محمد لما لقى كوكي دخلت وراه الاوضة قال: كوكي عشان خاطري ما تزعليش منها إنت عارفاها ست كبيره.
كوكي: ما أنت عارفني عمري ما أزعل منها كفايه إللي هي جابت لي حاجه كنت بتمناها من الدنيا كلها وأن أنت كنت عوض السنين ليا ده كفايه حنيتك.
محمد: انا عارف إللي أنت بنت أصول وجدعه وعشان كده عمري ما حتخلى عنك وما يفرقناش عن بعض غير الموت.
فجأه يلاقوا حد بيفتح الباب ويقول: أن شاء الله عدوك إللي يموت وتبص لكوكي وتكمل ارتحتي يا اختي خليتي ابني يدعي على نفسه بالموت.
محمد: في إيه يا ماما هو أنت كنت فين.
فوفا: في إيه لا يا حبيبي اوعى تفتكر أن أنا كنت حاطه وداني على الباب وبسمعكم بتقولوا ايه لا ده أنا كنت معديه في الصالة فسمعت سيره الموت لا يا اخويا ما تدعيش على نفسك أن شاء الله عدوينك.
محمد يخبط على رأسه ويقول لها: خلاص يا ماما خدي بقى كوكي في إيديك واطلعي بره.
فوفا: واخدها ليه ربنا إللي بيأخد خليها عندك هنا قاعدة، او تطلع لوحدها هي مشلولة، أنا أصلا مش طايقها هي تطلع تقعد في المطبخ تشوف هتحضر إيه للعشاء.
محمد : لا النهاردة عشان كوكي إللي هي عملته طول النهار فأنا حجيب عشا جاهز.
فوفا: وليه يا حبيبي المصاريف أنت متجوز ليه مش عشان هي تطبخ وتأكل وترعاك، ده كفايه أن أنا طول النهار لا بطلب زي الحموات أكل معين بأكل أي حاجه بتعملها ما هي تعتبر زي بنتي.
محمد: ماشي يا ماما حاضر حجيب بس عيش وهجيب حبه حاجات كده بسيطه يعني مش هجيب حاجات كثير.
فوفا: براحتك عاوز تصرف الفلوس أن شاء لله تخليك على الحديده ما ليش فيه.
كوكي بصيت لمحمد وعينها فيها الدموع .
فوفا: هو انا جيت جمبك يا بنت أنت ولا بترمي بلاكي عليا، طب إيه رأيك والله ما أنت قاعده هنا يلا بره اطلعي بره البيت.
محمد بغضب: هي بتعمل كل إللي أنت بتطلبيه ورغم عمايلك معاها برضه بتحاول تراضيكي.
فوفا: أنت بتنصف مراتك عليا طب والله ما أنت قاعد انت كمان فيها ومعاها على السلم.
محمد: يا ماما طب اريح ربع ساعه ماشي.
فوفا: مش حيحصل يلا خد مراتك معاك لو مكنتش في حالي ومش بفتح خاشمي كنت عملت فيا ايه، كنت وديتني دار مسنين، اهي دي آخرت إللي تربي عيلها ولما يكبر يمشي وراء مراته، ارتحتي يا ست كوكي عصتيه عليا.
كوكي: يا ماما يهديك ربنا طب انا حروح عند ماما وانت خلي معاكي.
فوفا: خدي جوزك في إيديك يا غاليه في أي حته.
محمد: خلاص يا كوكي لمي حبه هدوم لينا وتعالي نروح عند والدتك نقعد كام يوم هناك، تكون امي روقت كمان.
خلاص بيفتحوا الباب وماشيين
فوفا: يا ميله بختك يا فوفا، تربي وتكبري وفي الآخر أبنك يسيب لك البيت ويمشي في ضهر مراته ويسيبك يا عيني ما يدورش عليك، مش مهم هتقعدي مع مين ولا تتكلمي مع مين ولا تحضري الاكل لمين ولا تاكلي مع مين، اه يا جزاتي يا ربي والله يا ربي ما عملت حاجه وحشه في دنيتي عشان اتقابل بكل ده، ده أنا زرعت ما حصدت.
وقعدت تعيط
محمد صعبت عليه فقال: ما أنت إللي طردتينا.
فوفا: من عمايل مراتك السوده اللي مش بتسكت.
كوكي: هو أنا جيت جنبك.
فوفا: هو أنت كمان عاوزه تيجي جنبي يا بنت انت، أنا مش مرتاحه ليكي أصلا.
كوكي: مش أنت منقياني وقولتي دي إللي حتشيل إبني.
فوفا: انا قلت كده يا بنت أنت بتقوليني كلام يا كذابه، طب يلا خدي شنطه هدومك وروحي عند أمك وما تجيش يلا حبيبتي يلا الباب اللي يودي.
بعد ما طلعت كوكي ولسه ما وصلتش على باب الشقة.
فوفا: محمد هي مراتك راحت فين ده دخلت المطبخ لغايه دلوقتي ما طلعتش جيبها يا أخويا ترتاح ولا هي مش عاوزه تشوف وشي وزعلانه من قعدتي معاكم.
محمد بيبص لأمه: يا ماما أنت مش لسه طرداها.
فوفا: أنا يا إبني أوعى يكون يا ولا زعلتها أيوه ما أنا عارفه عمايلك السوده، ما ينفعش تبقوا زعلانين من بعض.
كوكي تبص لمحمد و محمد بيغمز ليها.
فوفا: محمد هو انت بتتفق عليا أنت ومراتك طب والله ما أنتم قاعدين فيها ويلا بره خليني الحق المسلسل.
محمد: كنت عارف يلا يا كوكي خلي اليوم يعدي.
محمد خد كوكي وقعدوا على باب الشقه.
كوكي: بقى لينا سبع سنين على نفس الموال.
محمد: مش عارف كل يوم علي ده المنوال ما تسكتش إلا لما تكرشنا بره وحبه وحتيجي تنادي عليكي علشان تدخلي تحضري ليها العشا وهتدخل تنام بعد كده، ونطلع أنا وأنت نلم الحاجات إللي إحنا حاطينها على باب الشقه من اكل وسبرتايه علشان الشاي وندخل ننام، خلاص ده حتى الجيران لما حد يحتاج حاجه مننا بيقولوا عندك محمد ومدام كوكي افتحوا الباب حتلاقوهم على باب الشقه اطلبوا اللي انتم عاوزينه.
حبه وسمعوا صوت بيقول: أنت يا بت يلا تعالي علشان تحضري العشا.
محمد وكوكي بصوا لبعض وراحوا ضاحكين وقالوا ما فيش فايدة.
عزة كمال (حياة)
تعليقات
إرسال تعليق